有性無愛全因渴望愛 - 25 - 認真的鬧劇

　　「今日個講道提醒我哋，信耶穌就係學習忘記背後努力面前。」麥太說。「我哋做新生命釋放，就係其中一種修行方法，幫助大家努力向前。」

　　然後她給大家紙和筆，請大家寫下最想擺脫的經歷。

　　雯雯想到很多，但真的在這裡坦白寫下來嗎？

　　和爸爸的關係、媽媽的離世、Frank、上一份工作、之前留學的事、自己的心理健康⋯⋯

　　要數似乎可以一直數下去，要講自然也可以講不停，但這些都顯然不是能和陌生人談的事。

　　其實每個人都可以有很多事想人關心，但不代表別人想關心⋯⋯不知怎地，雯雯，一個平日自問不是很會得深思大小問題的人此刻這樣思考起來。

　　或許來對她來說，來這裡最大的得著就是頭腦變得敏銳起來。

　　在她正要苦笑之際⋯⋯

　　「其實唔信耶穌都係咁𠺝，I mean，無論信唔信，都係要努力向前㗎啦。」Tracy說的時候，雯雯想起「逆水行舟，不進則退」。

　　「信耶穌又唔同喎，當你開始信主，主會帶領你，光照你內心嘅黑暗，你就唔使靠自己一個咁辛苦。」麥太回應道。

　　「現實世界咪又係一個人。」

　　「所以我哋有小組囉。」麥太繼續說。「我哋一齊行，每個教友都係家人，係神嘅後裔。」

　　「講嘅啫，你話一家人，唔通真嘅咩？」

　　「靠住主，凡事都能。」

　　麥太的回應強化了雯雯覺得這裡很盲目的感覺，至少這和當年父母帶她去教會時的觀感很不一樣，雖然同樣地，她沒有信耶穌，但那時沒有很反感，當然有可能只因年紀小。

　　又過一會，麥太說：「大家寫成點呢？有啲人仲寫緊，不如再俾多啲時間？乜都寫得㗎，寫啲到宜家都仲令你覺得遺憾嘅往事，然後好似一開始咁講，做一個新生命釋放嘅儀式。」

　　「乜嘢係新生命釋放？」Tracy問道。

　　「我哋用祈禱同聖水，進行潔淨。」

　　「其實係咪同啲道士整啲符水俾人飲一樣嘅概念？你話⋯⋯」Tracy似乎過了這裡的底線，麥太沒有等她說完便回應：「道士嗰啲係拜偶像，拜假神，主耶穌就唔同，係真真實實嘅神，而且就算你唔信，有無可能靜靜哋俾大家一個釋放嘅機會呢？」

　　「問下啫。」Tracy沒有繼續問下去，但令雯雯想得更多，究竟為甚麼要信耶穌呢？如果一定要有一個信仰，一定要基督教嗎？可能找個道士、和尚或者禪師聊天更有得著，而且，即使選擇了基督教，也不代表要選擇來這裡。

　　「雖然想kill time，但呢個所謂嘅『研究所』有啲不倫不類⋯⋯」雯雯默默下了結論，起來，把「補眼丸」塞到麥太手裡，離開。

139Please respect copyright.ＰＥＮＡＮＡskAAGzCI1O

ns216.73.216.217da2