《相愛十年》//《結咗婚十幾年，好似已經唔太愛。》 - 圓（一）

「爸爸媽咪，你哋去咗邊啊？」

棉花糖幫阿朗和思思開門。

思思笑答：

「我哋啱啱落咗公園玩，你冇見到我哋咩？」

「見唔到，我行前門嗰條路番屋企。你哋咁大個人仲玩？我都唔玩啦。」

棉花糖語帶一點無奈，似乎覺得父母極其幼稚。

阿朗搭一搭思思的肩頭，放棄撇清自己其實無心玩耍的念頭：

「係啊，我哋今日好有童真。」

「真係冇你哋符。咁你哋快啲去沖涼，早啲休息啦，我入房做功課先。」

「好。」

思思和阿朗對看了一下，饒有意味地挑眉；他笑笑地說：「等間細聲啲。」

「錫我一啖先。」

他們很久，都沒有自發性地親吻。肢體不一定可以傳達一些意思，有時僅僅是一個動作；但是，她希望當中有情意。

他吻她，停留數秒，然後慢慢地退開，和她對看。

她眼泛淚光，吞了一吞口水，他抱一抱她，撫摸她的頸項。

「沖涼啦你。」

她笑說。

夜不涼，心熱身灼；入睡，一夜無夢。

這樣的快樂和快活能維持多久呢？那一刻，他們都覺得是永遠。

永遠不是一種臆測，而是應該作為目的地化為行動的勇氣和決心，不可再退縮——到底永遠是多遠？

也許，他們都知道，愛不是一種堆砌言辭就可蒙混過關的戲法，而是需要付出的。有時，需要為了去買她喜歡的鞋子，而擱置自身買球鞋的想法；但是，絕不能只得一人作出這樣的犧牲，否則，她就會擁有兩雙鞋子，而他卻沒有。

所以，她也會去買他喜歡的球鞋，繼而建構同一份温馨。

怎可能只是用口說說想改呢，尚要付諸行動，是否？

若然，只因為悲傷、失落，來勒索對方留下，眼淚怎可能化成鎖扣和繩索拘束對方留下來呢？

來，一起攻刺未來吧。

- - -

三十五歲。

阿朗和思思三十五歲，而棉花糖已經升讀中學。

一天，臨睡前，棉花糖到主人房和思思說：

「媽咪，我聽晚唔番屋企食，要同老師同埋同學食飯，應該夜少少先會番屋企。」

「好，小心啲。」

「番唔番嚟開會？」

剛梳洗完、內進房間的阿朗看着棉花糖，提醒她今天有家庭會議。

「你哋開住先囉？我番到屋企再加入啦！」

「OK，食得開心啲。」

棉花糖走時，順便替阿朗和思思關燈關門：「早唞啦。」

他倆無話，空氣很靜。躺下，閉眼，轉身，阿朗小聲地說：

「聽日開會喎。」

「嗯。」

「棉花糖唔喺度。」

她睜眼：「照開啦，習慣嚟㗎嘛，我有嘢講。」

「好，其實我都係。」

「咁平時做咩唔講嘅？幾時都講得㗎。」

漆黑中，阿朗平躺睜開眼睛，側頭，看見思思的睫毛正在擺動，仿佛想飛翔；他答：

「之前未組織好吖嘛，咁又就嚟開家庭會議，諗住可以正式啲一次過講吖嘛——你呢？」

「我都係。」

她輕輕點頭。

他將身子轉向她：

「我哋好似坦白咗好多。」

「應該係。我冇辦法抗拒儀式感、同埋，違背契約。咁幾好吖。」

她看他的頭髮又長了一點點，忽然安心，仿佛，一切都在正常地過，無論他們有怎樣的情緒、想法、事務，只要他們願意，就可以好好地互相理解，然後在晚上摸對方的髮。

即使此刻，二人都有一些事沒有說出口。

但一想到，明天就要講、就要和對方溝通，而非漫無目的、遙遙無期地自我糾結，還是比較安心的——至少知道自己要在哪個時間點，去做什麼、講什麼、聽什麼，這已是一種踏實。坦然，他們都比以前要有安全感。

「瞓啦。」

他輕輕吻一下她的面頰，她以酒窩點頭。

ns216.73.216.67da2

Reading Theme:

Font Size:

Line Spacing:

Paragraph Spacing:

Load the next issue automatically