我是來償還上輩子欠你的債 - (十四) 朋友

「今日要食咩？」又到了星期三，在放學前我問阿銘。

「今個禮拜唔洗啦，要去開會，唔知搞幾耐。」阿銘是我們班的班會主席，他與鄰班的幾個主席要協助老師籌辦下星期在小學部舉行的活動。

「咁你冇口福，阿嫲喺發哥到留咗半隻白切雞，我一陣就去攞。」

「頂啊，咁我唔去開會得唔得？！」最喜愛吃白切雞的他問。

「下次，下次。」我笑著說。

當我正準備離開時，阿靜卻叫住了我：「喂。」

「咩樹？」

「你...去買餸？一齊？」

「唔係啊嘛？有陰影喎。」我裝作害怕地說道。

「咁算囉！」她也故作生氣地回應。

「講笑姐，行啦！」

在前往地下鐵站的路上，彼此卻保持了沉默，周遭的空氣被一股尷尬的氣氛籠罩著。我努力尋找一個能引起大家興趣的話題，但我的大腦似乎一片空白，怎麼也想不出一個適合的話題。

我偷偷地從眼角瞥向她，卻恰好與她的目光相遇。我們立刻把目光移開，這一瞬間的交流更加深了當下突兀的溫度。

「好奇怪喔。」她突然開了口。

「嗯？」

「我哋一係就喺到鬧交，一係就完全唔講嘢。」

「老實講...呢次係我第一次，同小昭以外嘅女仔獨處。」我如實地把害羞的情緒告訴了她，說出這句話時，還緊張得心扑扑地跳。

「我都估到。」

「你點估到的？」我帶點驚訝地問。

「睇你咁唔識同女仔相處，一定係異性絕緣體。」她說。

「你有好多經驗咩？」我問。

「我...其實都係第一次...」她輕聲地說，語氣更越來越小。此刻的她，臉頰早已變得緋紅。

「嗤，講真咩？」我不禁笑了一聲，她馬上對我怒目而視。

「咁我以前讀女校啊嘛...」她說。

「咁點解會轉過嚟？」我問。

「因為...屋企出咗啲事，所以先搬屋囉。」她欲言又止地說，也是的，以我們現在的關係，也不便把私人事揭露太多。

「喔...所以果一次喺街市，係你啱啱搬到新屋？」

「嗯，點知就撞到你呢個衰人！」她雖然在罵我，卻不是用惡劣的語氣。

「冤枉啊，我真係到而家都覺得我只係講道理。」

「咁諗深一層又真係嘅，反而係我仲想用錢解決，其實應該係我唔啱嘅。」她竟然在我面前懺悔起來，這突如其來的反思，反倒讓我有點不好意思。

看著她鼓起臉腮的樣子，倒真是有幾分令人心動的可愛。

「咁唔怪得你果次會幫我，好彩你一早諗通咗。」我再提起被韋家誠誣衊的事件。

「唔係喎，只係我知道俾人屈係咩滋味，我先唔想有人同我一樣。」

「和好啦。」我伸出友誼之手，向她示好。

「你就想，都話你爭我個糯米雞。」她拍開我的手，故意鬧著說。

「聽日賠返你啦！」我說。

原來有些解釋，是很講求時機地去說。一直以來，總覺得與她之間彷彿存在著一種抗力，即使雙方願意去傾談，但彼此間的交流像被一股無形的力量阻隔。在把一切都攤開來說後，感覺抒懷了不少。在看著她時也再沒有那種緊張的感覺。

我想，從這一刻起，我們算是真正意義上的「朋友」了吧。200Please respect copyright.ＰＥＮＡＮＡebnu29B1jM

ns216.73.216.113da2